AGAMES 討論區

標題: [轉貼)女警鬼上身 [打印本頁]

作者: 快樂天使 時間: 2009-5-23 20:34:01 標題: [轉貼)女警鬼上身

天xx警區一巡邏小隊，發生警員離奇死亡事件．
　　
　　一個陽光普照的下午，四名警員於車上巡邏，途經一處山坡地，發現小量炮竹，因
為數量少得很（只得一小排），有人提議丟棄，以免阻下班時間，一名較年輕的警員光
仔，二十一歲，竟拿了炮竹走向山邊，燃著了拋向草叢，剛巧拋中了一個山墳，呯呯．．
數聲過後，警長強叔責了光仔幾句，責他任意莽爲，由於山邊無人，亦無追究，強叔命
各人上車整理文件以待收工．
　　四時，警車使進警處，各人下車時，驚覺光仔昏迷不醒，各人大驚，立即將光仔送
往醫院，光仔一直昏迷，醫生撿驗不出原因，幾天後光仔不治！
　　　　　　　　　　　　　　　　　
　　　　　　　　　　女警天生八字全陰
　　
　　一女警員名--yoyo（化名），師弟--雄的鄰居，自小受靈體問題困擾，一年總有幾
次怪病；小時只有少少發燒，十歲後發燒兼神志不清，十五歲後發燒兼且胡言亂語，因
yoyo家是水上人，篤信鬼神，已不知找了多少仙姑神婆，并未見有起色．師弟雄偶有向
我題及，但只是討論硏究，世事各有前因，我亦不以爲然。
　　　　　　　　　　
　　　　　　　　　　　少女力大無窮
　　
　　夜半二時多，剛與友人於酒吧飲了不少，回家途中時，電話響起，心中忽然有種不
祥之兆；電話中傳來師弟雄急速的聲音：「師兄，大件事嘞！yoyo大失常性，發哂癲，
大吵大鬧．依家三個大男人都差 D 禁佢唔住，要幫手！」我當時真的很醉，連站也站不
隠，就跟他說：「今晚飲醉左，聽日先攪，得唔得？」雄說：「聽日？我依家去緊你屋
企喎！大約二十分鐘左右就到！」我說：「吓…咁你上黎先算！」
　　雖然面對鬼上身的人，我也算有經驗，但是醉酒才遇到，我還是第一次，也不知效
果如何，心想，阿雄也學法十年了，爲什麼他不出手呢？既然事情至此，當是天意好了
。yoyo我見過一兩次，中等身材，臉貌娟好，但是臉色總帶點蒼白。
　　二十分鐘過了，一輛白色小車上跳出了四個人，一個是阿雄，一個是yoyo的男友，
還有一個大約五十多歲身材很壯的男人，他身後站着一個約四十歲的女人，那男人一下
車就用一種不友善的眼神看着我，這種眼神我己見怪不怪，因為當他們發覺找了一個二
十歲出頭的黃毛小子驅鬼的時候，這個眼神我想是正常的．阿雄一見到我即刻向我招手
，我馬上走到車旁，車上一隻手突然抓住我：「marco救…我…！」yoyo很辛苦說了一句
話就暈了．當時看到她咀邊有白沬，臉色灰白。其實我也好不了多少，暈頭轉向，我強
作精神說：「扶左佢入屋先講！」
　　入到屋內，先將yoyo扶到祖師壇前一張椅上，她已昏迷不醒。阿雄向我介紹：「這兩位
是世伯，伯母，那是阿健你們見過了！」我向他們點點頭，問：「幾時開始發覺唔妥？」　　
yoyo媽媽哭着臉說：「下午佢同事打電話比我，話佢係警車上暈倒，然後送到醫院，醫生
話佢可能疲勞過度，叫我好好比佢休息，回家時佢只係話有點暈和有點攰，食左D粥一直
；瞓到午夜十二時開始唔對路，我馬上揾阿雄，阿雄來到時佢己問非所答。」阿雄接着說:
「我一去到，見到yoyo己經瘋瘋癲癲，又認唔出我係邊個；於是攞出一張符想鎮住佢，佢
一見到張符就狂性大發，合我們三個人都幾乎捉唔住佢。諗過報警但又怕佢保不住份工
，佢一時力大無窮，一時又迷迷糊糊，反反覆覆，足足用了差不多一個鐘頭才成功捉到
佢上車，上車後先打電話比你。」
　　　　　　　　　　　　　　
　　　　　　　　　智鬥鬼上身
　　
　　當時yoyo在壇前一直軟弱無力地坐着，神情呆滯。我用手拉阿雄於一旁，細聲說：
「今晚我飲大左，反應可能比較慢，你攞一件法器同一條繩企係yoyo身邊，見機行事。我
就打算今晚以文代武，同鬼講數。」阿雄連連點頭；由於我肯定yoyo身內有一冤魂，而且
冤氣很重，攪不好可能會動手，但事情危急，我也身材高大，大不了綁起她再說；我坐
在壇旁向着yoyo，一臉正經，沉聲問道：「喂！朋友，你知唔知你係邊度，我係邊個。」
yoyo突然睜開眼，用一把男聲低沉的說：「你··是x教xxx師··傅．你···要幫··我，師··
傅我好···慘！」我聽見後也覺意外，它好像有備而來，我也不示弱：「幫你？你知我係
邊個仲係度？仲唔走？你係唔係要我出手！」它回答：「我··唔係唔···想走，而··係黎
到···呢度我··唔郁···得，嗚……」我聽到它哭，我己知它開始軟化，說道：「你究竟想
點？」它說：「我原··本係···天xx第三··隊，我··姓張死得···好無··辜……」在一旁的
yoyo媽突然驚叫：「yoyo佢啱啱調到天xx兩日…」我示意yoyo媽先別說話；到這時，我己
清醒一點，開始估計到一些情況，它想找替身，但遇上我才改變初衷，它己攝伏於我，不
怕跟它談條件，遂向它說：「人，我一定要保，你要咩要求？」它說：「我要···一··堂齋
．．．」我轉向yoyo媽說：「伯母，比唔比佢！」yoyo媽說：「marco，我六神無主，你幫
我出主意。」我向它說：「人地窮等人家，打堂齋要幾萬銀，冇可能！」它說：「我··屋
企得···一個··信··教既阿··嫲同一個··細佬···佢地唔··識燒···野比··我···我依家咩··
都無，上唔到路．．嗚．．．．」這時yoyo媽向它說：「我地無咁多錢打齋，不如燒多 D
野比你啦！」它默不作聲，像是在考慮，我搶着說：「一於係咁；一男丁、一女丁、一個
衣櫳、一間屋、金銀元寶、燒肉、酒、水飯。唔可以再多，七日後燒比你，你可以唔要，
亦可以唔走，留係度同祖師爺一齊。」它見我語氣這樣強硬便說：「好··但係··我依家··
·走唔到····」我對它說：「拿！係呢度你唔郁得，而家我叫佢地返屋企，個女仔返到屋
企而你仲未走既，我唔會再燒野比你，仲會收左你，我講得出做得到，應承得你既野，我
亦一定會做！」它低下頭說了聲：「好．．」我向阿雄說：「你依家送yoyo返去先，到
左yoyo屋企情況仲係咁既話，打電話比我，我會出手捉佢架嘞！」其實我當時雖然清醒不
少，但已經疲倦不堪，要捉它也要等明天再算，先嚇嚇它而已，yoyo媽臨走時握住我的手道：
「marco！你一定要睇住yoyo呀！」我道：「放心，我會嘞伯母！」而全程沒有開口的世
伯，此時拍拍我膞頭微笑說：「我個女靠哂你嘞！」就是這一句，我己知道這塲戲成功地
騙人又騙鬼了！
　　　　　　　　（待續）

作者: 快樂天使 時間: 2009-5-23 20:34:54 標題: 女警鬼上身(下)

山坡兇地

女警yoyo回家後，回復正常，但已經完全記不起發生過什麼事，第二天放工後，我去到yoyo家，看看情況，避免那陰靈潛伏在她
家裏，yoyo媽滿臉笑容，我看見她的表情已經知道yoyo平安無事；她跟我說：「yoyo佢尋晚返到嚟真係醒返，不過就好攰，返咗入房瞓，今朝
起身精神好好，我同佢講返尋晚既事，佢話返差館問下同事，嗰區有冇咩奇怪事發生過，到依家都未返。」我向她表明來意：「伯母，尋晚其
實好危險，yoyo醒得咁快算好好彩，隻鬼唔上yoyo身唔代表佢已經走咗，我上嚟都係睇下佢走咗未，呢度有兩張符，一張比yoyo袋，一張貼係
大門口，以防萬一，我今晚就查下件事究竟係點！」我放下兩張符然後離去；回到家拿出yoyo八字在壇前追探，發覺yoyo本身很容易招惹邪靈
，雖然自小至大常有撞邪，但每次都不同靈體，即是說yoyo跟一般人不同，身邊每有不懷好意之靈體一定出事，她完全没有抵抗能力，今次是
一隻要找替身的冤魂，那冤魂生前是警員那麼巧合？是不是另有玄機？電話响起，是阿雄：「師兄！yoyo問到原來佢嗰隊以前有個姓張既同事死咗，yoyo就係調去頂佢個位架，你話幾邪，仲有，佢地情況好相似，都係山上面話頭暈，不過姓張嗰個就救唔返，yoyo就冇事！」我冷冷答他：「冇事？你依家問返個正確位置，你立即同我一齊去現場睇睇！」估不到阿雄二話不說答：「OK！冇問題。」他的人就有這個長處－－爽快。
　　那山坡位於天xx不遠，山上人跡罕至，只山腳下疏落幾個農場，遍地死鷄，死豬，垃圾，臭氣氛天，山上幾個孤墳，另一面臨海，是當年
偷渡勝地，每年發現溺斃屍體無數，山上冤氣什重，好一個活生生的鬼域。當時大約十時左右，只有遠處有幾點燈火，天色烏黑，最重要是我已經發覺被它們包圍，數量很多，此地不宜久留，我們倆駕車到了一空地，阿雄說：「應該係呢度，yoyo話有棵大樹，大樹側邊有間爛木屋！」我向阿雄說：「我哋落車睇睇！」我們下車時一陣狂風刮起，我口中喃喃地道：「你哋唔使緊張，我係嚟睇吓啫，冇惡意o既！」我走到木屋中，看見那木屋破爛不堪，已經荒廢很久，屋內有一木框，斜掛在破爛的牆上，隠約是一幅人像，我跟阿雄說：「冇野睇，走囉！」然後走出屋外上車，在車上阿雄多次想說話，都給我用眼神打住了，大約十分鐘後，汽車走出山坡範圍，回到街上，阿雄問道：「你睇唔睇到？頭先木屋入面有個影閃嚟閃去？」我向阿雄說：「我依家知咩事嘞！」阿雄問：「咁快！咁係咩事？」我向他笑道：「咁心急？打電話比yoyo問吓依家去佢屋企方唔方便，上到去先至講！」阿雄見我不說，只好一臉不肖地打電話給yoyo；我並不是故作神秘，而是要整理下一步行動。剛到門口，yoyo已經站在門外：「marco！今次真係煩倒你，唔好意思！」我笑着說：「大家朋友一場，唔使客氣，請食飯咪得囉！」我們到屋內坐下，見到yoyo的爸媽，男友都在，跟他們打了招呼，向yoyo說：「妳今日臉色好好喎！妳放心啦，今次無事架嘞！我仲想借呢次嚟攪大佢，等妳以後唔使怕佢哋！」yoyo媽問道：「查到原因啦！yoyo冇事就好囉！點樣可以以後唔使怕佢哋！」阿雄此時亦開口：「頭先個影係一個男人，係唔係尋晚上yoyo身嗰個！」我說：「頭先唔比你係山上面問，係唔想比佢知道我哋想點做，而且我哋一路落山，都有嘢跟住我哋，頭先你見倒嗰個，就係尋晚自稱姓張嗰個，但係嗰度陰氣好勁，唔應該係一個隻新既鬼形成，我要再查吓，至於yoyo，因為隻鬼已經返咗個山度，佢應該係等緊我哋燒嘢，所以yoyo可以絶對放心，隻鬼唔會再攪佢，至於yoyo以後點樣唔再怕比鬼上身，我想襯今次呢個山咁重陰氣既機會招魂，同時祭天，再當天燒一張表文！」阿雄答：「咁既環境仲招魂，真係會招到好多嗰喎！」我回應：「就喺想佢多，越多越好，最好就比全世界都知道！」yoyo媽問：「marco，如果係咁，我哋要點做，我多多錢都使，唔會少你嗰份！」我笑道：「錢，我都想要！不過我哋唔收得錢架，係師傅話架，妳最好事成後，上我到還神就得架嘞！妳聽日去衣紙舖，買定嗰晚應承咗既野，仲要另外買一份觀音衣，一份地主衣；記得，溪錢同七色紙一定要多，其他既事我會攪！今晚係第二晚我哋仲有幾日時間，呢幾日yoyo記得袋隠張符，夜嘞我哋走嘞！」回到家，再到壇前探問山坡情況，得出結論，爛木屋中原有一陰靈，久無人祭，由於當地環境，形成厲鬼，張姓警員（光仔），一時魯莽，引起厲鬼注意，慘成目標，遇害身亡，光仔死後，厲鬼替補光仔投胎，變成光仔留於當地尋找替身，警車常到該處停迫，車上yoyo成為光仔目標！厲鬼身份成謎！我修爲不足，無法查證！
　　　　路祭滿山冤魂
　　路祭當日，由於yoyo狀態不佳，遂安排yoyo家人留在屋中相陪，我們代辦，約於晚上八時集合，我帶了兩位朋友，阿雄亦叫了一朋友相助
一共五人，由於祭品多，一行人要分兩車前往目的地，我和阿雄一車，其他三人一車，臨行前我向各人再三叮囑注意事項：「陣間上到山，唔
好有笑容，唔好亂講野，最緊要係落山時絶對唔可以擰轉頭，要一直出咗個山既範圍爲止！落山時你三個一架車行先，阿雄你攞D溪錢殿後，你臨走時將D溪紙撒向天，然後上車走！」眾人面色凝重，上車出發！
　行車途中，我問阿雄：「你有冇袋架撐（法器）係身！」阿雄應道：「有呀！咁既環境唔袋點攪呀！」我說：「唔好攞出嚟，等佢哋冇介
心，越聚得多越好，一陣程序係咁；先請觀音娘娘，我已經將yoyo既情形寫咗落張黃紙度，張黃紙連埋觀音衣一齊燒；跟住拜地主，應承比姓
張既野連埋地主衣一齊燒，等其他鬼搶唔到佢D野，然後向四面裝香，撒米，等引到差唔多夠數既時候，我再係佢哋面前宣佈觀音娘娘已經庇佑yoyo，睇佢哋以後仲敢唔敢攪yoyo！」阿雄：「嘩！攪咁大壇野，我哋返壇會唔會孭鑊架！」我說：「會！所以我頭先出門口時，已經裝咗香話咗比祖師知呢壇野係你叫我做既！」阿雄驚說：「你唔係呀，大佬！」我笑說：「係，我真係講咗！」．．．．．．
　　到了山坡地，各人忙於搬祭品，點香；環境出奇地平靜，我亦如計劃，拜觀音，拜地主，只是當付薦（燒野）給光仔時，見到有白影一閃
，及開始有風，儀式已經做了大半，其他人臉色亦較放鬆，到阿雄向四方撒米之際，我聽見四方八面隠約傳來一些聲音，留神再聽，不得了，
數量真的超乎想像，我台頭望向他們，他們臉色發白的四人一同看着我，明顯不只是我聽到，那種聲音雖然微弱及夾雜風聲，但氣勢像有上萬
人看球賽時同時發歡呼聲一樣轟動，當眾人呆若木雞之際，山坡上同時有十多隻野狗衝向我們，除阿雄外其他三人已轉身想逃，我大喝：「唔好郁，企定！」十多隻野狗從山上不同方向夾着尾巴跑到空地，發覺有人及有火光，又四散逃亡，牠們是盲目的逃亡，十多野狗在山上見到五個陌生人，竟然一聲不吠，忙命的跑，慌不擇路，原因只有一個－－－有更恐佈的在後面追趕着牠們，情況的確怪異，氣氛也異常恐佈；風越來越大，我忙向他們說：「快！揾人執野先，我哋要係D火熄之前上車走，如果唔係，佢哋冇野搶，就向我哋埋手，快！阿雄！記住唔好燒哂D溪錢呀！如果唔係你同我今晚唔使瞓嘞！」我急忙拿出另一黃紙誦道：「奉XXX教令，今有信女yoyo．．．．得觀音娘娘庇佑，今後邪魔勿．．．．．．．如有犯者，無情收斬．．．．．．．！」我燃點黃紙時，已走到車旁，阿雄亦一手開車門，另一手握溪錢準備，此時，他們三人早已在車上。此時手上黃紙已燒得差不多，我說：「開車！」我跳上車，同一時間阿雄一手將溪錢撒向背後！
　　回到公路上，真的有重回人間的感覺，我笑問阿雄：「爽唔爽！」阿雄答：「爽呀！不過都唔明你做咩唔用師傅教嗰套，捉咗佢咪算囉，
揾D咁野攪！」我說：「吓吓用師傅嗰套邊好玩架，幫到人咪得囉！還掂D人見到我哋咁後生都唔信我哋架啦！咪玩大佢囉，唔係點服眾！」阿雄：「服咗你呀！服眾！約咗佢哋係X記宵夜呀．．．．！」
　　
　　　　　後記
　　yoyo自那次以後，至今五年多一直平安無事；當晚幫手路祭的三人，有兩位經歷了那次後，完全改變他們對宗教之態度，入了道教，而
yoyo的爸爸，每次見面時，總是熱情招待！」
　　
　　
　　　　　　　　　　　　　　　　　　（（完））

作者: issac999 時間: 2009-5-24 19:07:22

哇!係咪小說搵出ge!

作者: carman789 時間: 2009-5-31 21:30:17

唔算恐怖啦!!!
好長同埋睇到隻眼好累~:L

作者: octopus207 時間: 2009-6-2 18:08:11

呀!...
我真係好驚呀!!

作者: JPBUG 時間: 2009-6-9 12:10:38

幾好看算恐怖啦

歡迎光臨 AGAMES 討論區 (http://61.244.113.49/)